Yil davomida to‘ldiriladigan mazkur kundalik haqida eshitgan bo‘lsangiz kerak. U insonga o‘zini anglashi uchun ko‘mak beradi. Biz Stoik kundaligi bilan tanishib, undan o‘nta savolni ajratib oldik.
Kundalikdagi savollarga yosh shoir Shahriyor Shavkat javob beradi.
- Qaysi yomon odatlarimdan haliyam qutulolmadim?
Aniq kun tartibiga tushishni har kuni mashq qilaman. Ba’zida o‘xshaydi, ikki-uch kun o‘tib hayotim bir xil o‘tayotgandek tuyiladi. Ammo aniq bilaman, pala-partish hayotdan rejalashtirilgan tizimga o‘tsam, ko‘zlagan maqsadlarimga vaqtida erishaman. Chunki hammasi shunga bog‘liq. Sog‘lik, ijod, mutolla, ish, dam olish…
- Muloqot qiladigan odamlarim meni o‘stiradimi yo aksincha?
Odamlar bilan iloji boricha kamroq gaplashsam deyman… Shu yerda ham Navoiy hazratlari haq: “Meni men istagan o‘z suhbatig‘a arjumand etmas, Meni istar kishining suhbatin ko‘nglum pisand etmas.”
- Yaqinlarim xato qilsa ham ularni sevishda davom etamanmi?
Yo‘ldosh Eshbek: “Vijdon bu xatodan ulg‘aygan azob” deydi. Shunga qaramay, men xatoning ko‘lami va oqibatiga qarab muomala qilaman.
- Osmonga qaraganimda nimani his qilaman?
Boshqa sayyoralarda hayot borligiga ishonaman. U yerda ham bizga o‘xshagan odamlar bo‘lsa kerak. Eng yomoni – osmonga kam qaraydigan bo‘lib qoldik…
- Shu vaqtgacha taqdir menga qanday tuhfalar ilindi?
Men o‘zimni omadli odam hisoblayman. Oilam, do‘stlarim, tanishlarim, ishim, ijodimdan ko‘nglim to‘ladi. Taqdir shularni berdi. Bulardan yaxshirog‘i bo‘lganda ham shularni tanlardim. Odam hadeb o‘zini-o‘zi ezavermasligi kerak. Bo‘lgan, bo‘lyapti, bo‘laveradi. Nasibaga yarasha…
- Oradan yuz yillar o‘tib men haqimda nima deb eslashlari mumkin?
Yuz yil davomida o‘zbek tili katta o‘zgarishlarga uchraydi. Yozganlarimni hozirgidan kamroq odam o‘qiydi. Meni qiynagan muammolar ular uchun kulgili bo‘lib qoladi deb o‘ylayman. Birlamchi ehtiyojlarni qondirish uchun hayotimning katta qismini sarflaganimni bilib, ustimdan kulishmasaydi deyman…
- Hayot pyesasida men qanday rolni ijro etyapman?
Tomoshabin…
- Qasos nimanidir yaxshilashga yordam berganmi?
Yo‘q. Eng yomon ko‘rganim shu. Millatlar avlodlariga o‘z qasoslarini ham meros qilib qoldirishidan yomoni yo‘q.
- Sevgi beramanmi yoki olamanmi?
Bor tovog‘im, kel tovog‘im shaklida.
- Menga chindan ham tegishli bo‘lgan nimadir (kimdir) bormi dunyoda?
O‘zim. Oila a’zolarim. Yozilajak kitoblarim.
