(fristayl)
Ket.
Aqlli ket.
Hozir
Shunchaki
Ket.
Hammadan voz kechib
Ket.
Qolma bu yerda.
G‘alati bu yer.
Rasvodir bu yer.
Ket.
Endi ket.
Ketishga
Ixtiyoring bo‘lishi bilan
Ket.
Imkoning bo‘lishi bilan
Ket.
Qarama ortga.
Eslama.
Unut endi.
Barini unut.
Tushingga ham kirmagandek
Eslama ularni.
Endi ket.
Aqlli ket.
Hozir ket.
…va biroz yasha.
***
Ular
Seni sevmaydi.
Ishonma ularga.
Ular seni aldayapti.
Sevgi bunaqa bo‘lmaydi.
Sen ketishing kerak
Hozir.
Aqlli ketishing kerak.
***
Ishonma ularga.
Gapiraveradi ular.
Sen qarama ularga
Ular tomon
Boshingni burma.
Sen ularni tinglama
Eshit faqat
Eshitish ham qanaqa —
Ularga qarab
Xuddi tinglayotgandek
Jim qarab turaver
Ularga.
Ular esa gapiraveradi.
Sen esa ulardan ketishing kerak
Shuni tushun.
Sen
Hozir
Ket.
Aqlli ket.
Ular baribir seni sevmaydi.
***
Eshitma ularni
Ularning oldida turma
Tushunyapsizmi…
deb,
Gapiraverishadi…
Gapiraverishadi…
Ularga
Ketmasang bo‘ldi,
Ular seni qoldirmoqchi emas
Ammo, ketmasang bo‘ldi ularga
Ular shunaqa g‘alati bo‘ladi
Na seni sevmaydi
Na seni qolishingni so‘rashadi.
Ammo, ketma deyishadi.
Tupur ularga.
Sen hammadan voz kech
Va aqlli ket.
Sen ularga ayt
Ketishingga imkon berishsin
Yo‘llarni yopishmasin
Uchishni taqiqlashmasin.
Ularni eshitgandek
Ularga qarab
Eshitgandek bo‘lib turaver
Va imkon bo‘lishi bilan
Ket.
Hozir ket.
Aqlli ket.
Sen ketishing kerak.
***
Boshingni og‘ritishmasin seni
Bosh faqat senda bormi, deyishmasin
Agar aytishsa
Ayt
Ha, bosh faqat menda bor, deb ayt.
Boshing borligi uchun ham
Sen ketmoqchisan
Sen ket.
Hoziroq ket.
Ularning oldida turma.
Ket.
***
U sen bilan ketmaydi.
Nima sen, u men bilan ketadi, deb o‘ylaysanmi?
O‘lib qolsa ham
Sen bilan ketmaydi.
Chunki sen ketmoqchisan
Ularga esa ketadiganlar yoqmaydi.
Ayniqsa
Aqlli ketadiganlar.
Sen esa ket.
Kutma ularni.
Yalinma ularga.
Birga ket deb.
Ularni qoldir
Va sen ket.
Ular senga kerak emas.
Ular senga zarur emas.
Ular seni
Zotan
Sevmaydi.
Sen esa ket.
Ular esa
Zotan
Baribir
Sevmaydi.
Sen esa ket.
Hozir ket.
***
Nega o‘zi ular sevmadi.
Yo‘q, sen tahlil qilma.
O‘ylama ularni.
Ular kerak bo‘lsa
O‘zini o‘zi tahlil qilsin.
Seni vaqting yo‘q
Ularni tahlil qilishga.
Sen ketishing kerak
Sening vaqting
Faqat ketishga qolgan.
Sen chiroyli ket.
Aqlli ket.
Vaqtida ket.
Xullas,
Ket.
Hozir ket.
***
Ketsam bo‘ladimi, deb so‘rab o‘tirma
Balo bormi so‘rashga.
Nima
Umringni senga
Ular berganmi?
Hayotingni senga
Ular berdimi?
Jonni senga
Ular berdimi?
Yuragingnichi?
Asra yuragingni ulardan.
Ket.
Hozir ket.
Yuragingni asra ulardan.
Yurak bir marta beriladi insonga.
Bitta sen
Bitta yuraging
Hozir ket.
Ket deyapman senga.
Ket.
Aqlli ket.
Chiroyli ket.
Ket.
***
Shartta yuragingni olginda
Ket.
Ularga qoldirma o‘zingni.
Ketayotgan yuragingga qarab qolsin
Muzliklar.
Seni sevmaydigan
Muz aholisi.
Ket ulardan.
Qara hammayog‘ingni muz bosib ketipti.
Muzlardan qoq o‘zingni.
Silkinsang
Muz parchalari sochilib ketsin
Atrofga.
Ketayotganingda qolmasin senda muz.
Yo‘lda ketayotib erisin sendan muzlar.
Sen ket.
Hozir ket.
Aqlli ket.
***
Hozir kelaman,
deginda,
Ket.
Shu yerda turib turinglar
deginda
Ket.
Ketib yubor.
Qaytma.
Biz zotan
Qaytmay
Ketish haqida gaplashyapmiz.
Qaytsang
Ketishga balo bormi unda.
Biz
Tugal ketish xaqida
Tamoman ketish haqida
Butunlay
Muqarrar
Aniq
Va aqlli
Ketish haqida
Gaplashmoqdamiz.
Sen ket.
Gaplasha turib
Ket.
Eshitib turib
Ket.
Hozir, bir daqiqa
deginda
Ket.
Seni ketmaydi deb o‘ylashsin
Ketadi deb
O‘ylashsa ham
Bir tiyin.
Nima deb o‘ylashlari
Zotan
Ular o‘ylab bo‘lishdi.
Vaqt hozir
Faqat
Sening ketishingga qoldi.
Boshqa hech narsaga
Vaqt qolmadi.
Ket.
Muz aholisidan
Ket.
Muzlama boshqa.
Oh,
Yurakni isitish
Qayta
Yurakni isitish
Mayli, o‘ylama
Avval ket.
Keyin bular.
Bularning bari keyin.
Sen hozir ket.
Aqlli ket.
Ket.
***
Ortingdan
Qarab qolishsa ham
Ket.
Ortingdan
Yig‘lashsa ham
Ket.
Ular
Yolg‘on yig‘layapti.
Ular senga o‘xshab
Rost yig‘lamaydi.
Jinni bo‘lma
Ularga ishonma.
Sening ko‘z yoshlaringga o‘xshamaydi ularning ko‘z yoshi
Ularning ko‘z yoshi
Sun’iy yoshdir.
Qarama ortga.
Nima sen, ular menga o‘xshab rost yig‘laydi, deb o‘ylaysanmi
Jinni bo‘lma.
Ket.
Hozir ket.
***
O‘zing keta turib
Yig‘lab yuborma yana
Oh,
Balo bormi
Ularga yig‘lab
Ular sening
Na kulging
Na ko‘z yoshingga arzir.
Ular sening
Ketishingga arziydi faqat.
Sen faqat
Ulardan ket.
Ular sendan
Faqat
Ketishni ko‘rsin.
Ket.
Hozir ket.
Aqlli ket.
***
Nega ketdi
deb o‘ylashsa ham.
o‘lib ketishmaydimi endi
Sen lekin ket.
Achinma ularga
Zotan ular
Hech achinadigan holda emas.
Yuragingga kim achinadi unda
Muz bosib ketgan yuragingga.
Ket ulardan.
Tashlab ketdi
deyishsa ham.
Ket.
O‘ylama ularni.
Sen ketishing kerak.
Bo‘ldi endi
O‘lguningcha
Qolma ularning yonida.
Ular seni sevmaydi-ku.
Zotan,
Ular seni sevmadi.
Qachondir ketishing kerak edi baribir.
O‘sha qachondir degan sana
Bugun.
Hozir.
Ket endi.
Ket.
Hozir ket.
***
Haliyam shu yerdamisan?
Endi
Ket…
***
Sen baribir ketmoqchi eding-ku to‘g‘rimi?
Endi ket.
Ular seni sevmaganiga
Battar bo‘lishsin.
Sen esa ket.
Ko‘zing uchgani yo‘q ularga
Ular qolsin o‘zi
Ularni o‘ziga qoldir
Ular —
Seni sevmaydigan
Ahmoqlardir.
Qoldir ularni
O‘z ixtiyoriga.
Ixtiyori bilan
Qo‘shmozor bo‘lishsin.
Sen esa
Ularning yonida qolma.
Ayt
Men ketaman, de
Dam olish ma’nosida
Damingizni oling, de
Ket ulardan.
Hozir ket.
Aqlli ket.
Ortga qarama.
Ket.
***
Keyinroq ketarsan
deyishsa
Aldanma ularga yana.
Yana ular seni aldayapti
Sen o‘lguningcha
Aldanma
Yasha biroz
Rost yasha
Biroz rost yasha…
Ularsiz yashasang
Rost yashagan bo‘lasan
Ulardan sen
Hozir ket.
Ular
Seni sevmaydigan
Yolg‘onchilardir.
Ulardan
Yuragingni olginda
Tez ket.
***
Qolsang ham bo‘lardi, deyishadi senga
Bo‘lmaydi, de!
Qachongacha bo‘ladi deysan?
Bo‘lmaydi!
Ket endi.
Ket.
Ularning
Unaqa edi,
Bunaqa edi,
degan jinnicha gaplarini eshitma.
Sovuqligini qara ularni.
Gaplari seni muzlatadi.
Gaplaridan muzlab qolasan.
Eshitma ularni
Ular o‘zining
Gipotezasi bilan
Qo‘shmozor bo‘lsin.
Sen ket hozir.
Ket.
***
Ertami
Kechmi
Ket.
Sen ketishing kerak.
Ertalabmi
Kechqurunmi
Ket.
Iltimos
Ketgin.
Ket ulardan.
Ular seni boshqa
Topa olmasin.
Sevishlarini
Kutma.
Ular baribir
Seni sevmaydi.
Sevsa zotan
Bittada sevardi.
Qolgani esa
Absurd narsalar
Ortiqcha umid
Ahmoqona umid
Absurd umid.
Sen ma’noli ish qil
Ket.
Ularni kutishing
Bu ularga juda ko‘p.
Ular kim bo‘pti o‘zi?
Sen esa kimsan!
Arziydimi ular senga?
Yo‘q, albatta!
Shuning uchun
Ket.
Hozir ket.
Iltimos, ketgin.
***
Adabiyotini
O‘ziga topshir.
Falsafasini
Fikrlarini
Boshiga sol.
Sen o‘zingni
Olib
Ket ulardan.
Sen buni qilasan
Uddalaysan buni.
Yuragingni
Muzliklardan olib ketasan
Issiq o‘lkalarga!
Oh
Ularga aytma qayerga borishingni.
Sen shunchaki
Ularni tark et.
Ket ulardan.
Hozir ket.
Ketgin.
***
Mayli,
Seni insonlar
O‘lgan deb eslasin
Ketgan deb eslasin
Qaytmaydi deb eslasin
Tupur ularga
va ket.
***
Bu yerda jahl yo‘q
Hotirjamlik ham
Bu yerda
Faqat
Ketish bor.
Ketish haqida
Ushbu yoziqlar.
Sen esa
Ket.
Hozir ket.
Ahmad Ali Dilmurod
