Yoniq yuraklar

2
307
ko'rishlar soni

Anglam

1.

Niqobimni tashladim yechib

Bolakayning ko‘ziga qarab.

Ketgim keldi o‘zimdan kechib

Bolakayning ko‘ziga qarab.

Yuragimga nurlari oqdi,

Yaratganning sirlari oqdi.

Ko‘r diydamning kirlari oqdi,

Bolakayning ko‘ziga qarab.

Tajallidur Ma’no sirlari

Ilm-u urfon naqadar g‘arib.

Soxta ekan angladim bari

Bolakayning ko‘ziga qarab.

Kiprigimni gilamday qoqdim,

G‘ubor ketdi — ko‘zimga yopdim.

U dunyolik xazina topdim,

Bolakayning ko‘ziga qarab.

Beg‘uborlik- baxtning tumori

Na o‘lim, na sevgimas kori.

Tug‘ilmoqning tutdi xumori

Bolakayning ko‘ziga qarab.

Nur ichganday nurab qolgan qalb

Bir hapqirdi borliqni alqab

Nahot, Seni eshitdim, yo Rab,

Bolakayning ko‘ziga qarab.

2.

Ukajon.

Bilmayman tilingni,

Kalomlar yog‘diradi qarog‘ing.

Nabiy-u valiylar tilimas, hatto

Xudoning tilida so‘ylar nigohing.

Ukajon.

Nigohing ohangdir:

Sukunning sirini singdirgan,

Isrofil surini sindirgan,

Ko‘zlarning,

Yuzlarning yuzidan

Soxtalik ranglarin sidirgan

Ohangdir, ukajon.

Ukajon.

Orom ol pishillab

(Uyquda uyg‘onur odamlar).

Dumini tishlagan ilonday

Tushlar-da to‘lg‘onur vishillab.

Ukajon.

Menam bir dalliman

Qiqirlab yig‘lagan jilg‘aday.

Sayrashni o‘rganmay ming yilda,

Ko‘mishni o‘rgatgan qarg‘aday

Dalliman…

Bilmadim,

Ichganim sharobmi?

Tushunmas ishq mayin ichmagan…

(Dahriy deb ossalar Mashrabni

Fig‘oni Arshgacha sachragan).

Ukajon.

Sen uchun bor ma’no,

Dunyodir ayangning siynasi.

Angladim: abasdir bu dunyo,

Ongdagi qafasdir bu dunyo,

Ko‘zlaring — Xudoning oynasi.

Ko‘zlaring — Xudoning oynasi.

Asliddin Abdurazzoqov

* * *

… ga

To‘rt taraf savolzor, to‘rt taraf izlam

Qidirar qidirib kelgan dilni dil.

Rangi qora emas og‘riqning, turfa —

Ishq bilan, Baxt bilan unsa gar butkul!

Bir Istak otashi, bir Yo‘qlov sasi,

Har yurgan dil yo‘lim qamrab boryotir.

Men istagan yasham boshqa edi-ku —

Meni o‘zga qadar vaqtga qoryotir…

..Mavlom, bir His bergil, gullasin qalbim,

Yangi hayot — Ishqqa ko‘llasin qalbim.

Tashnaman — ming yilki, keldim quvilib

O‘zingga u bilan yo‘llasin qalbim…

Yo‘qsa Senga qaytar yo‘lim yo‘q… yongan.

Orzumurod Nurmatov

* * *

Men Atoning farzandi deysan,

Men Havvoning farzandi deysan,

Davomini etmasang-da fosh

Sotib qo‘yar g‘ov hasadlaring

Qobilga-da ekaning qondosh!

Qorishib borasan sharobga,

Pajmurda o‘y etadi ta’qib.

Yupatasan o‘zingni go‘yo

Yarimlagan qadahga boqib:

«Axir bu…

Ta’qiqlangan meva emas-ku?!»

Ruhingda o‘sadi g‘alayon,

O‘zingdan o‘zingga yolvorib.

Kishansiz, eshikli xonada

Dajjoldek kutasan erkingni,

Chiqolmaysan lek uni yorib..

Unutib borasan aslingni,

Ko‘nikib qolasan boringga,

Va ruhsiz ketsang ham bir kuni

O‘zing-ku, achinmay yashaysan,

Maymunlar yig‘laydi holingga.

Ungacha, axtargin rostingni,

Taqvoga gard tutmay panada.

Yo Haq deb, ol Haq deb, bor Haq deb

Tavbalar toshmasa ko‘zingdan

O‘zingni Atodan sanama,

O‘zingni Atodan sanama!!!

Zarnigorxon Abduolimova

* * *

Iymanib yaproqlar pinjida

Shudringni raqsiga to‘yayin.

Shahardan sovugan ko‘nglimni,

Ko‘ngillar yurtiga qo‘yayin.

Tillashib yam-yashil maysalar,

Oy bilan suhbatlar qurayin.

Ahd bergin, Xudo, ber hafsala,

Hol so‘rsam, itidan so‘rayin.

Gullarin bir nafis ko‘rki bor,

Ifori bor yutsa-yutgulik.

Qari-yu yoshini ilki bor,

Bulutni bir hatlab o‘tgulik.

Men esa majruhga aylanib,

Qoldimmi keng shahar bag‘rida?

Tuzalsam kelaman aylanib,

Voz kechib ketgani baridan.

Shahrizod Shodiyev

* * *

Osmon to‘la havolar,

faqat menga yetmaydi.

(Sh. Rahmon)

Otamning deyolmaganlaridan…

Ta’bir bering tushimga…

Ta’bir bering tushimga —

Netsam ta’qib etmaydi?

Ko‘zlarimdan bolamning

Kulgilari ketmaydi.

Meni hamma kutar-u

Bitta o‘lim kutmaydi?

Osmon to‘la havolar-

faqat menga yetmaydi.

faqat menga yetmaydi.

Qibla tomon qayerda,

Yuzim burib qo‘y, bolam!

Balki, ketgum sayrga

Yuz-ko‘zimga to‘y, bolam.

Faryod solma, kar dunyo-

Eshitmaydi, qo‘y, bolam.

O‘rtansam ham qabrimda

O‘rtaydi bir o‘y, bolam.

Mushtoqlikning yarasi

Mahshargacha bitmaydi.

Kelib-kelib turaman,

Ko‘ngling bo‘lsin xotirjam.

Ranjimayman boshimga

Har kun borolmasang ham.

Bu oxirgi siylovmas-

Bardam bo‘linglar, bardam.

So‘nggi bora suv tutqaz-

Sen bersang, obi zam-zam.

Endi sensiz suvga ham

Mening tishim o‘tmaydi.

Zuvalam azaldan xom,

Ammo qismat- rasida.

Hozir qishmi, yo bahor

Deraza orqasida?

Kuz bo‘lsa ham mayliga-

Havo bersa, bas edi.

Axir, men ham bitgandim

Xazonlarga qasida…

Tinch qo‘yib qo‘ymas bu dard-

Tinchitib ham qo‘ymaydi.

Shamoldan uchqur edim-

Bir sabocha shashtim yo‘q.

Shamolmidi yo bo‘ron

Yuragimga soldi suq.

Dunyo sadqa pallamda

Bo‘layapman tasadduq.

Baqalar yerdan turib

Yulduzlarga urar do‘q…

Yulduzlarga urar do‘q-

Madorim manglaydagi

Chivinga ham yetmaydi.

Oh, charchatdi hayotning

Bergan o‘lik umidi.

Men-ku, mayli, sochimning

Oqargani shumidi?

Tiriklikda ming bora

O‘ldirgani kammidi?

So‘roqlansam,

so‘ralsam,

Darvoqe, men kim edim?

Dard degani birgina

O‘lish bilan bitmaydi!

So‘roqlansam,

so‘ralsam…

Darvoqe, men kim edim?

Rashid Xo‘jamov

* * *

Yig‘loqi

Onajon, erka qizing chinor bo‘lmoqchi edi,

G‘ishtinlari mustahkam minor bo‘lmoqchi edi.

Bugun chinor bardoshi kesilyapti birma-bir,

Minordek emasligi sezilyapti birma-bir.

Bir nafasda yuz yillik shovqin hamda sukunat,

Onajon yuragingni berib turgin omonat.

Chumchuqdayin chirqirab chinorlarga yot bo‘ldi,

«Shoh» deb asrab yurganing «piyodaga» mot bo‘ldi.

Qizingni xayollari qoqigulday qaqshaydi,

Seni bugun judayam,

Sog‘inganga o‘xshaydi.

Gunoh bilma onajon qizing shunday o‘yloqi,

Chinorday ko‘rinsa ham, «shotitut»day yig‘loqi…!

Gulzoda Qaxramonova

* * *

Balki bu shunchaki tasodif, taqdir

Ilk bor nigohimiz to‘qnashtiradi.

Qalbimizda nedir uyg‘onar… Bir kun

Va yana bizlarni uchrashtiradi.

Ohu ko‘zlaringni olib qochasan,

Sekin jilmayasan dilga o‘t qalab.

Men senga tuturman guldastalarni,

Senchi, sog‘inchingni dasta-dastalab.

Uzoq termuladi nigohlarimiz,

Til so‘zlamas, so‘zlar ko‘zdan o‘qilgay.

Oq oydin yo‘llardan keturmiz birga

Kulasan, bi-ir olam baxtlar to‘kilgay.

Havaslar yog‘ilgay, sevgiga olqish,

Odamlar kuzatib qolishar qator.

Sevgimiz haqida so‘zlab bog‘larga

Atrofda kezinib yuradi bahor…

Afsus, ismingni ham bilsam koshkiydi,

Qaydan izlay seni, ey sohibjamol.

Seni uchratganim rostdir, lek bari

Qolgani xayoldir, qolgani xayol.

No‘monjon Jo‘rayev

* * *

Toshkosang ham sindi. Endi chop,

Mushtlaringni ezib zaminga.

Sening yashil ko‘zing uyqutob

Daraxtlarni qo‘zg‘ar, aminman!

Oqshomlarning etaklari oq,

Qismatingning och yo‘llari — tim.

Hech kim senga solmasa quloq —

Mana shu erk bo‘ladi, inim.

Quyoshga tut, kun ko‘rsin yelkang,

Yelkalaring axir ozoddir.

Ozg‘in-ozg‘in qo‘lingni ulkan,

Qanotlarim deya hayol qil.

Va uch! Shahar g‘ovurlarini,

So‘qmoq bo‘ylab adashtirib qayt.

Dengiz yutgan chig‘anoqlarning

Qulog‘iga «uyg‘ondim» deb ayt!

So‘ng… to‘ydirar bu erk, shubhasiz,

Qovurg‘angga mixlangan qushni.

Shunda qo‘msa, izlab ket sassiz,

Butlangan toshkosang — turmushni…

Azizbek Yusupov

* * *

Hushlarim azobdir,

Tushlarim — rohat.

Odamday yashayman tushda harqalay.

Yo Xudo, tushlarga uloqtir, hayhooot…

O‘ngimda charchadim gunoh orqalab.

Qonimda kezadi mal’un tuyg‘ular,

Yurakni qistovga olarlar qurshab.

Tanimga cho‘kdilar jirkanch quyqumlar,

Ruhim to‘lg‘onadi ozodlik istab.

Iblis kun ko‘radi bu ,,ohʼʼ lar bilan,

Anduhlarim boshi ko‘kka tegadir…

Ichimda shaytondek maddohlar bilan

Ibodat qilgani qo‘rqdim negadir.

Men — yorug‘ dunyoda manglayi qora,

Hayotdan ko‘zikdim: kirdi suq, kini.

Barcha-barchasidan qutulsam zora,

Yo Xudo, tushlarga uloqtir meni…

Yo Xudo, tushlarga uloqtir meni…

Quddus ASAD.

2 Izohlar

  1. Ukajon.

    Bilmayman tilingni,

    Kalomlar yog‘diradi qarog‘ing.

    Nabiy-u valiylar tilimas, hatto

    Xudoning tilida so‘ylar nigohing.

    Ukajon.

    Nigohing ohangdir:

    Sukunning sirini singdirgan,

    Isrofil surini sindirgan,

    Ko‘zlarning,

    Yuzlarning yuzidan

    Soxtalik ranglarin sidirgan

    Ohangdir, ukajon.

    Ukajon.

    Orom ol pishillab

    (Uyquda uyg‘onur odamlar).

    Dumini tishlagan ilonday

    Tushlar-da to‘lg‘onur vishillab.

    Ukajon.

    Menam bir dalliman

    Qiqirlab yig‘lagan jilg‘aday.

    Sayrashni o‘rganmay ming yilda,

    Ko‘mishni o‘rgatgan qarg‘aday

    Dalliman…

    Bilmadim,

    Ichganim sharobmi?

    Tushunmas ishq mayin ichmagan…

    (Dahriy deb ossalar Mashrabni

    Fig‘oni Arshgacha sachragan).

    Ukajon.

    Sen uchun bor ma’no,

    Dunyodir ayangning siynasi.

    Angladim: abasdir bu dunyo,

    Ongdagi qafasdir bu dunyo,

    Ko‘zlaring — Xudoning oynasi.

    Ko‘zlaring — Xudoning oynasi.

    Astaģfirulloh bu sherni dindan xabari bor odam yozganmi
    savollar.muslim.uz ga yozib shu sherim gunohmasmi desin. Isrofil nayini sindirdi Isrofil alayhissalom qiyomat kuni chaladigan nayniya.

    iltimos oylab kòrsin shu sheri haqida.
    Alloh barchamizga tavfiq va hidoyat bersin amiyn.

Javob yozing

Izoh yozing
Ismingizni kiriting