- Partnyoringiz sizningcha qanday inson va ijodkor?
Sh.O: Yaxshi ijodkor va samimiy inson. Mahliyoda insonni har qanday sharoitda tinglay bilish xususiyati kuchli shakllangan.
M.U: Partnyorim rostgo‘y inson va juda mas’uliyatli ijodkor.
2. Sizningcha u aql bilan yashaydimi yo yurak bilan?
Sh.O: Menimcha, u aql bilan yashaydi. Har holda menga shunday tuyuladi. Fe’l-atvorida cho‘rtkesarlik bor ozgina.
M.U: Ko‘proq aql bilan yashaydi deb o‘ylayman.
3. Uning ismini ma’nosini bilasizmi?
Sh.O: To‘g‘risi, bu haqida sirayam o‘ylab ko‘rmagan ekanman. Ma’nosi nazarimda insonlarni o‘z qalbi va tashqi go‘zalligi mahliyo qila olishni nazarda tutsa kerak.
M.U: Dovyurak, botirlar avlodidan degan ma’noni anglatadi.
4. Undagi qaysi xislatlarni hurmat qilasiz-u qaysilarini yoqtirmaysiz?
Sh.O: Ma’suliyatli va samimiyligini qattiq hurmat qilaman. Ijodda dangasa, shu kamchiligini yoqtirmayman. Balki oila va farzandlardan ortib she’r yoza olmayotgandir hozir. Ammo chinakam ijodkor har qanday vaziyatda yozishdan to‘xtab qolmasligi kerak.
M.U: Harakatchanliklarini, mas’uliyatlilarini yoqtiraman, qaysarliklari esa…
5. Uning hozirgi adabiy jarayonda tutgan o‘rni…
Sh.O: Mustahkam deya olmayman. Lekin intilsa, o‘z ustida ishlasa yaxshi shoiralardan biri bo‘lib o‘z o‘rniga ega bo‘lishi mumkin.
M.U: Juda sermahsul ijodkor, hatto xalqaro adabiy jarayonlarda ham faol.
6. U bilan oxirgi marta qachon gaplashgansiz va nima haqda?
Sh.O: To‘g‘risi, oxirgi marta kecha gaplashdim. Uning ilk kitobi haqida.
M.U: Yuzma-yuz “Kuz simfoniyasi” kitoblari taqdimotida gaplashganmiz.
7. Unga kimlarni ustoz sifatida tavsiya qilardingiz?
Sh.O: Tiriklardan tavsiya qilmayman, chunki ular ko‘pi bir tiyinga qimmat va o‘zlari ustozga muhtoj. O‘lganlardan Shavkat Rahmon va Anna Axmatova ijodlarini chuqurroq o‘rganishini tavsiya qilaman.
M.U: Bilmadim, o‘z ustozlariga va o‘z yo‘liga ega ijodkor deb o‘ylayman.
8. Undan nimalarni o‘rgana olishim mumkin deb o‘ylaysiz?
Sh.O: Yuqorida aytganimdek insonni tinglay bilishni. Bu borada undan master klass olish mumkin.
M.U: Juda yaxshi kitobxon, ko‘p kitob o‘qiganliklariga havasim keladi.
9. Uning kitoblarini shaxsiy kitob javoninizda saqlaysizmi?
Sh.O: Mahliyoning ilk kitobi endi chop etildi. Nasib bo‘lsa qo‘limga dastxati tushirilgan bu kitobi kelib tushsa, kitob javonimda albatta saqlayman.
M.U: Albatta, taqdimotda dastxatlari bilan olganman.
10. Uning qalamiga mansub siz sevgan she’r yoki nasriy asar qaysi?
Sh.O: Bolalik xotiralari haqidagi she’ri yoqadi menga ko‘proq.
M.U: “Yomg‘ir valsi” hikoyasi.
11. Uning yozganlarida nima ko‘proq ko‘zga tashlanadi? Ruhiyatmi, badiiy tasvir bo‘yoqlarimi yoki quruq syujet liniyasimi?
Sh.O: Ko‘proq badiiy tasvirga urg‘u beradi.
M.U: Ruhiyat ko‘proq ko‘zga tashlanadi.
12. Agar o‘xshatish mumkin bo‘lsa uni qaysi mashhur badiiy asar qahramoniga o‘xshatgan bo‘lardingiz?
Sh.O: Rostini aytsam uni Lev Tolstoyning “Urush va Tinchlik” romanidagi Natasha Rostovaga o‘xshataman.
M.U: “Choliqushi” romanidagi Komronga.
13. Uning asarlari tarixda qoladi, deb hisoblaysizmi?
Sh.O: O‘ylashimcha, buni vaqt ko‘rsatadi.
M.U: Ko‘p asarlari yaxshi yozilgan.
14. U bilan do‘st bo‘la olaman deb o‘ylaysizmi?
Sh.O: Allaqachon yaqin do‘stman.
M.U: Ha.
15. Bir lahza uni adabiyot kishisi emas, san’atning boshqa sohasida tasavvur qilib ko‘ring. Qaysi sohaga mos keladi?
Sh.O: Rassom sifatida ko‘z oldimga keltiraman. Menimcha, uning tipaji bunga mos.
M.U: Ulardan juda yaxshi aktyor chiqsa kerak.
16. Qahva ichish, teatrga borish, sayr qilish… shulardan qaysi birini u bilan amalga oshirgan bo‘lardingiz?
Sh.O: Shekspirning “Hamlet” spektaklini ko‘rish uchun u bilan birga teatrga borgan bo‘lardim. O‘zbek Milliy akademik drama teatriga.
M.U: Menimcha qahva ichib suhbat qurgan bo‘lardim.
17. Unga bitta yaxshi kinofilm tavsiya qiling.
Sh.O: Marta Fayns rejissyorligida 1999 yil ishlangan “Onegin” filmini tavsiya qilaman.
M.U: Bu borada yaxshi did egasi bo‘lishlari kerak. Chunki ijodkor o‘z ruhiyatidan kelib chiqib tanlov qiladi.
18. Unga bitta yaxshi nasriy, bitta nazmiy asar tavsiya qiling.
Sh.O: Uilyam Folknerning “Avessalom, Avessalom” romani va Iosif Brodskiyning she’rlar to‘plamini.
M.U: Sherzod Ortiqov men bilgan barcha asarlarni o‘qib chiqqanlar. Shuning uchun bu borada ojizman.
19. Dunyo bo‘ylab sayohat uchun unga qaysi shaharni tavsiya qilardingiz.
Sh.O: Venetsiya shahrini. Bu shaharga har bir kishi borishi kerak aslida go‘zallik nima ekanini to‘liq tushunib yetishi uchun.
M.U: Bilmadim. Men dengizga borishni hohlayman, ular borganlar menimcha.
20. Partnyoringizga dil tilaklaringiz.
Sh.O: Oilasi va farzandlari baxtiga sog‘-omon bo‘lsin. Ijodiy ishlariga zafarlar yor bo‘lsin!
M.U: Doimo ruhiyatlari va shaxsiyatlari baland bo‘lsin. Ulardan yangi asarlar, yangi kitoblarini kutib qolaman.
