Leonardo Gaston Xermann — Argentinalik shoir, pedagog va madaniyat xodimi. 1975 yilda tug‘ilgan. Argentinadagi “Voces del Viento” adabiy jurnali direktori. “Xalqaro yozuvchilar mitingi” tashkiloti asoschisi va rahbari. Shu kungacha “Tuproqdan anonim tirilish”, “Chegaralangan maktub”, “So‘z barrikadalari”, “Inson injili” kabi she’riy va nasriy kitoblari chop etilgan.
O‘LIMNING ZAFARI
(ballada)
Piter savdogarning qiyofasi va uning tangalar to‘la xaltasini teskariga yo‘naltiruvchi sharni kuzatmoqda. Bredaning burjua qishloqlari ufqning xira chizig‘i bo‘ylab tarqalgan. Derazalar bir-birini yoqalab uchayotgandek go‘yo. Samoga misoli o‘t qo‘yayotgan qo‘ng‘iroqlarning tovushi ortida urushning alomati ko‘zga tashlanadi…
Xuddi changalzorda
Noqulay vaziyatga tushib qolgandek
Bo‘ronda yo‘ldan adashgan qushlarni
Ko‘zlarim ko‘rgan burchak erlarda,
Ekilgan urug‘dan shira kutgandek
Yemirgancha go‘yo aybsizligin
Farishtalar murdasini vaqt
Kavlayotgan chorrahalarda,
Tepalikdagi labirintlarda,
O‘rmonga cho‘kkan tunlarda,
Ajdodlar sadosi ostida
Ichiga qurtlar in qurgan
Ko‘pik aralash bog‘langan
Bosh chanoqlarida,
Yuz yil oldin portlagan
Yulduzlarni eslatuvchi suyaklarda,
Bir uyum kulga aylangan
Esxolatik alifbo, ilohiy fol kitobida,
Qorasonning har bir qismidagi
O‘tkir jon talvasasida-
So‘nggi faryodimning soyasi yotadi.
Ufqqa Isodek xochlanib
Tulporlarin ustixonlari-yu
Aravalari bilan g‘amgin
Ot yeldirib ketayotgan
Dushman chavandozlarida,
Furiyalar*ning berahm qo‘shini
Qamali paytida tutab nuragan
Qal’alar devorlari qoldiqlarida,
Holdan toygan o‘laksaxo‘r qushlar
Tamaddi uchun mayl bildirgan
Qilichdan o‘tkazilgan birma-bir
Bani odam ichki a’zolarida,
Vaboga chalingan yurt o‘g‘illari
Tanalaridagi qop-qora dog‘lar-u
Ko‘kraklaridagi qizil xochlar-la
Olib ketilayotgan yuk kemalarda,
Tanaga botib, suqilib kirgach
Uni bo‘laklarga ajratadigan
Nayza qurg‘urning to‘rt tomonida-
So‘nggi faryodimning soyasi yotadi.
Daydi, darveshmonand hofizning
Aft-angorni bujmaytiradigan
Bo‘rttirma tasvirli xonishlarida,
Quyosh qizdirgan daqiqalarda
Jang maydonidagi irigan
Jasadlardan mazoxist kalamushlar
Uyushtirgan ziyofatlarda,
Bichilgan qul kabi kimsalar
O‘z aravalarida norasidalarning
Jasadlarini ortib ziyorat uchun
Davom etgan yo‘llar ortida,
Va nihoyat vatanimning
Har bir parchalangan qismida-
Eng so‘nggi faryodimning soyasi yotadi…
…Breda qo‘ng‘iroqlari misoli fil suyagidek gap. Parka** suyaklarning iplarini mudom qirqqani va qismatda ne yozilganiga qaramay o‘lim hech qachon g‘olib bo‘lmaydi.
Furiyalar- yunon mifologiyasidagi urush keltirib chiqaradigan yovuz ayol qahramonlar.
Parka- rim mifologiyasida tug‘ilish xudosi.
Ingliz tilidan Sherzod Ortiqov tarjimasi
