Prust anketasi. 14-juftlik

Loyihamizning galdagi ishtirokchilari yosh ijodkorlar Muhammadxon Yusupov hamda Yulduz O‘rmonova bo‘ldi. Marhamat, Prust anketasidagi savollarga berilgan javoblarni o‘qishingiz mumkin.

Anketa savollari:

1. Sizni eng ko‘p nima xafa qiladi?

Muhammadxon: Bizga bog‘liq bo‘lgan hamma narsaning ham tizgini o‘zimizning qo‘limizda emasligi.

Yulduz: Beparvolik.

2. Qayerda yashashni istardingiz?

Muhammadxon: Islandiyada. Betakror tabiati, yuqori hayot darajasi va yarim millionga ham yetmagan aholisi uchun.

Yulduz: Dengizga yaqin joyda.

3. Hayotingizdagi eng baxtli lahzani ayta olasizmi?

Muhammadxon: Hamma “birinchi marta”lar: maktabga birinchi marta chiqqanim, birinchi do‘stim, birinchi muhabbatim, birinchi marta otamnning ko‘zida faxr ko‘z yoshlarini ko‘rganim… Hamma-hamma “birinchi marta”lar. Umid qilaman-ki, oldinda ulardan hali ko‘plari kutib turibdi.

Yulduz: Sog‘inganlarimni ko‘rganimda.

4. Qanday xatolarni ikkilanmay kechirib yubora olasiz?

Muhammadxon: O‘ylamay qilinganlarini. Chunki uzoq o‘ylab qilingan xatolar juda yomon.

Yulduz: Deyarli hamma xatolarni kechira olaman. Faqat e’tiborsizlikni hazm qilolmayman.

5. Siz yaxshi ko‘rgan ayol personaj.

Muhammadxon: Devid Uork Griffit tomonida 1916-yilda suratga olingan “Toqatsizlik” filmida “tog‘lik qiz” laqabli personaj. Uning hatto ismi ham yo‘q, shunchaki, “tog‘lik qiz” deb ataladi. Ammo shu personaj orqali kinoga birinchi marta erkin, mustaqil, mag‘rur ayol obrazi kirib kelgan. Bu personaj kinoda, umuman, san’atda ayollarga bo‘lgan biryoqlama munosabatga umuman teskari edi, balki, shuning uchun ham menga yoqqandir…

Yulduz: Jeyn Eyr.

6. Siz yaxshi ko‘rgan erkak personaj.

Muhammadxon: Nolanning “Qora ritsar”idagi Joker.

Yulduz: Chingiz Aytmatov asarlaridagi hamma qahramonlar.

7. Tarixdagi siz yaxshi ko‘rgan qahramonlarni ayta olasizmi?

Muhammadxon: Ha, bir talay: Sparta podshosi Leonid, Chaplin, Oskar Shindler, Dezmond Dos, Gandi va barcha Ulug‘ vatan urushi qatnashchilari. O‘zimizdan Bibi Xonim va barcha jadidlar.

Yulduz: Muso alayhissalom.

8. Real hayotda siz eng hurmat qilgan ayol.

Muhammadxon: Birinchi navbatda – onam. Onam menga ona bo‘lmagan taqdirda ham, agar ularni taniganimda bundan kam hurmat qilmagan bo‘lardim. Agar onani, bunaqangi savolda shubhasiz tilga olinishini inobatga olib, qo‘shmasak, unda, Mehrinoz Abbosova va yana boshqa bir qator mening hayotimda chuqur iz qoldirgan xonimlar.  

Yulduz: Ayam.

9. Siz ijodini sevgan rassom kim?

Muhammadxon: Salvador Dali.

Yulduz: Men ko‘proq fotografiyaga qiziqaman. Fotoko‘rgazmalarga qoldirmay boraman. Ayniqsa, Zafar Ro‘ziqulov, Hasan Paydo, Muhiddin Ali ijodlarini kuzatib boraman.

10. Siz ijodini sevgan musiqachi yo bastakor kim?

Muhammadxon: Marshal Meters (Eminem), bastakorlardan esa, shubhasiz Hans Zimmer.

Yulduz: Skripachlar yoqadi ko‘proq. Motsart, Antonio Vivaldi, Vanessa Mey…

11. Bir erkak sizningcha qanday bo‘lishi kerak?

Muhammadxon: Erkak to‘xtamasligi kerak. Eng muhimi shu.

Yulduz:  Yuragi ham, bilagi ham birday kuchli bo‘lishi kerak.

12. Bir ayol sizningcha qanday bo‘lishi kerak?

Muhammadxon: Mustaqil.

Yulduz:  Tadbirli, xushfe’l va sirli.

13. Siz eng sevgan hislat.

Muhammadxon: Boshqacha fikrlash. Inglizcha ta’rifi aniqroq: “Thinking out of the box”.

Yulduz: Mardlik.

14. Qaysi ishni bajarayotganda o‘zingizni baxtli his qilasiz?

Muhammadxon: Bu ishimning mahsulidan odamlarga foyda tegishini bilsam, baxtli his qilaman.

Yulduz:  Kimgadir yordam bera olganimda.

15. Ayni dam kimning o‘rnida bo‘lib qolishni  istardingiz?

Muhammadxon: O‘zimning, faqat to‘qqiz yil oldingi.

Yulduz:  Bolalikdagi Yulduzning o‘rnida…

16. Do‘stlaringizda qanday hislat va fazilatlar bo‘lishini xohlardingiz?

Muhammadxon: O‘zlaridagi mavjud hislatlarni boricha, yashirmasdan ko‘rsatishsa, bo‘rttirishga intilishmasa, shu kifoya.

Yulduz:  Sadoqat yo‘qolsa boshqa tuyg‘ular ham o‘ladi. Shuning uchun vafoda hamisha sobit bo‘lishlarini xohlayman.

17. Eng katta nuqsoningizni ayta olasizmi?

Muhammadxon:  Yaqinlarim bilan tez-tez diydorlashib turmasam, ulardan uzoqlashib ketaman. Bu juda yomon.

Yulduz:  Kimdandir ranjisam, ko‘pincha tortishmay, olishmay, indamay voz kechib ketaman. Buni men kamchilik deb bilaman. Ba’zan ranjlarning yo sababini va yo hisobini so‘rash ham kerak.

18. Yaxshi ko‘rgan rangingiz qaysi?

Muhammadxon: Oq.

Yulduz:  Qora.

19. Siz sevgan gul turi.

Muhammadxon: Nilufar.

Yulduz:  Pushti atirgul.

20. Siz sevgan qush turi.

Muhammadxon: Boyqush.

Yulduz: Oqqushlar.

21. Qaysi yozuvchining ijodini yaxshi ko‘rib o‘qiysiz?

Muhammadxon: Chexov.

Yulduz:  Chingiz Aytmatov, Aziz Nesin, Chexov. O‘zimizdan Said Ahmad, Shoyim Bo‘tayev. Yosh ijodkorlar ichida ham doim kuzatib, o‘qib yurgichlarim bor.

22. Qaysi shoirning ijodini yaxshi ko‘rib o‘qiysiz?

Muhammadxon: S.Yesenin.

Yulduz:  Umar Xayyomni.

23. O‘zingizda bo‘lib qolishini orzu qilgan g‘ayritabiiy iste’dod turi bormi?

Muhammadxon: Uxlamasdan ham yashay olsam edi, deyman. Shunda, balki, hamma narsaga ulgurardim.

Yulduz:  Skripka chalish orzuim…

24. Qanday o‘lishni istagan bo‘lardingiz?

Muhammadxon: Faqat jisman…

Yulduz:  Sharaf bilan.

25. Hayotdagi shioringiz.

Muhammadxon: Biz boshqa birovdan emas, kechagi o‘zimizdan yaxshiroq bo‘lishga harakat qilishimiz lozim.

Yulduz:  Naqshbandiyning o‘sha mashxur hikmati shiorim: Dil ba yoru, dast ba kor (Ko‘ngling Xudoda, qo‘ling mehnatda bo‘lsin).

26. Ayni hozir ruhiy holatingiz qanday?

Muhammadxon: Halovatni his qilyapman. Prust savollariga javob yozishni ancha cho‘zib yurdim, bu, albatta o‘zimning aybim. Va nihoyat, bugun, javoblarni yozib, yakunladim. Bundan halovatni his qilyapman.

Yulduz:  O‘ychan. 

Nodirabegim oqqa ko‘chirdi.