Loyihamizning galdagi ishtirokchilari oilaviy juftlik — jurnalist Abdukarim Mirzayev hamda shoira Nafisa Omon bo‘ldi. Marhamat, Prust anketasidagi savollarga berilgan javoblarni o‘qishingiz mumkin.
Anketa savollari:
1. Sizni eng ko‘p nima xafa qiladi?
A: Anglata olmayotganlarim yoki anglay olmayotganlarim.
N: Arosatdagi (nima istashini bilmaydigan) odamlar.
2. Qayerda yashashni istardingiz?
A: Yomonliklardan uzoq har yerda.
N: Men kerak, menga kerak bo‘lgan odamlar orasida.
3. Hayotingizdagi eng baxtli lahzani ayta olasizmi?
A: Ketish onim eng baxtlisi bo‘lilishini istayman.
N: Ular juda ko‘p. “Bir kunda eng baxtli, eng baxtsiz ayol” degan she’r bor edi-ku!
4. Qanday xatolarni ikkilanmay kechirib yubora olasiz?
A: Nadomat va tavbasi borlarini. Lekin unutolmayman.Chunki unutish mening qo‘limda emas.
N: Bilmayman. Avvallari menimcha kechirimliroq edim. Bilib qilingan xatolar kechirilmasa kerak.
5. Siz yaxshi ko‘rgan ayol personaj.
A: Halol ayol.
N: …aqlimga kelmayapti…
6. Siz yaxshi ko‘rgan erkak personaj.
A: Halol erkak.
N: «Qiyomat qarz»dagi Sarsonboy ota. Bu ham onlik fikr. Aslida asarlardan qahramon izlash meningcha aqlli fikr emasdek. Chunki ijodkor o‘zi istagan insonni yozadi, chizadi. Hayotdan qidirish kerak. Masalan, mening bobom eng yaxshi ko‘rgan qahramonim, desam sizga mavhum bo‘ladi. Ammo rostdan ham shunday.
7. Tarixdagi siz yaxshi ko‘rgan qahramonlarni ayta olasizmi?
A: Payg‘ambarlar.
N: Hamma qahramonlarni hurmat qilaman. Qahramon bo‘lish oson emas. Rostdan ham hech oson bo‘lmasa kerak.
8. Real hayotda siz eng hurmat qilgan ayol.
A: Onam.
N: Ayamni hurmat qilaman. Borgan sari qattiqroq, borgan sari ko‘proq. Qaynonamni! Samimiy aytayapman. Va yana men hurmat qiladigan ayollar juda ko‘p. Fitnasi oz, kuchli, to‘g‘ri ayollarni hammasini hurmat qilaman.
9. Siz ijodini sevgan rassom kim?
A: Vinsent Van Gog.
N: Men ilyustriyadan ko‘proq mazza qilaman. Perro, Uonter… ko‘p juda.
10. Siz ijodini sevgan musiqachi yo bastakor kim?
A: Muhammad Otajonov.
N: Hozir o‘ylab qoldim. Men biror shaxsga butkul to‘xtalib, mutloqlashtirib qolmas ekanman. Shuning uchun alohida ajratib aytishga qiynalayapman. Bitta ijodkorning hamma asarini mukammal bo‘lmasligi mumkin. Shunday bo‘lganida ham hammaga birday ta’sir qilmasligi mumkin.
11. Bir erkak sizningcha qanday bo‘lishi kerak?
A: Sotilmaydigan. Sabrli.
N: Alloh qanday yaratgan bo‘lsa shunday bo‘ladi. Men unday bo‘lsin, bunday bo‘lmasin deb gapirolmayman. Bo‘lganicha bo‘ladi.
12. Bir ayol sizningcha qanday bo‘lishi kerak?
A: Bilimli, jasur va halol.
N: Ayol kishi ham! Kiyim tiktirayotgan bo‘lsangiz agar tikuvchiga aytasiz, yoqasi bunday bo‘lsin, yengi bunday bo‘lsin deb. Yaratilgan mavjudotlarning hech birining qanday bo‘lishi Siz bilan mening istagimizga va yoki tasavvurlarimizga bog‘liq emas.
13. Siz eng sevgan hislat.
A: Rizo.
N: Azmlilik.
14. Qaysi ishni bajarayotganda o‘zingizni baxtli his qilasiz?
A: Namoz o‘qiyotganda.
N: O‘zim istagan ishimni qilayotganimda.
15. Ayni dam kimning o‘rnida bo‘lib qolishni istardingiz?
A: Cho‘ponning.
N: Hech kimni o‘rnida bo‘lishni istamayman.
16. Do‘stlaringizda qanday hislat va fazilatlar bo‘lishini xohlardingiz?
A: O‘zlarini va boshqalarni aldamasliklarini istardim.
N: Do‘stlik fazilati bo‘lsin.
17. Eng katta nuqsoningizni ayta olasizmi?
A: Ucholmaganim.
N: Nuqsonlarim ko‘p juda. Menimcha, xavfli jihatim ko‘p va xo‘p ayayman hammani. Ichımda bo‘ladi janglar. Ammo bir payti keladiki qo‘l siltayman hammasiga.
18. Yaxshi ko‘rgan rangingiz qaysi?
A: Shaffof.
N: Hamma rang yoqadi. Hayotdagi barcha ranglar!
19. Siz sevgan gul turi.
A: Qurimaganlari.
N: Gullarni ham ajratmayman. Yantoq gullaganini ko‘rganmisiz? Juda chiroyli bo‘ladi, masalan.
20. Siz sevgan qush turi.
A: Oq chorloq Jonatan Lvingston.
N: Qushlarniyam ajratmayman. Ammo musichani ovozi yoqadi.
21. Qaysi yozuvchining ijodini yaxshi ko‘rib o‘qiysiz?
A: Sa’diy Sheroziy.
N: Chingiz Aytmatovni.
22. Qaysi shoirning ijodini yaxshi ko‘rib o‘qiysiz?
A: Maddoh bo‘lmaganlarini.
N: O‘zligi bo‘lgan hamma shoirlarni.
23. O‘zingizda bo‘lib qolishini orzu qilgan g‘ayritabiiy iste’dod turi bormi?
A: Tushda uzoqroq qolish.
N: Unday orzuyim yo‘q.
24. Qanday o‘lishni istagan bo‘lardingiz?
A: Iymonda.
N: Kalimamni keltirib.
25. Hayotdagi shioringiz.
A: Shiorim yo‘q.
N: Shiorim ham yo‘q.
26. Ayni hozir ruhiy holatingiz qanday?
A: Sokin.
N: Juda yaxshi.
Nodirabegim oqqa ko‘chirdi
