Prust anketasi. 13-juftlik

Loyihamizning galdagi ishtirokchilari yozuvchi Xoliyor Safarov hamda shoira Iroda Umarova bo‘ldi. Marhamat, Prust anketasidagi savollarga berilgan javoblarni o‘qishingiz mumkin.

Anketa savollari:

1. Sizni eng ko‘p nima xafa qiladi?

X.S: Tanish-bilishchilik…

I.U: Johillik. Ko‘p, balki barcha illatlar shuning zamirida yotadi menimcha.

2. Qayerda yashashni istardingiz?

X.S: Oilam bilan ota-onam yonida.

I.U: Garashada (ota, ona qishlog‘im).

3. Hayotingizdagi eng baxtli lahzani ayta olasizmi?

X.S: Ota-onam hayot bo‘lgan damlar…

I.U: Ona bo‘lishimni bilgan kunim. Ko‘p baxtli kunlar bo‘lgan (bo‘laversin, ilohim), aynan bittasini aytish kerak bo‘lsa, deb, shu javobni berdim.

4. Qanday xatolarni ikkilanmay kechirib yubora olasiz?

X.S: Xiyonatdan boshqa har qanday xatoni…

I.U: O‘zi kechirimliman, aynan ikkilanmay kechirib yuborganim xatolarni eslolmadim, ikkilanganmidim o‘zi yoki yo‘q?

5. Siz yaxshi ko‘rgan ayol personaj.

X.S: Kumushbibi.

I.U: Asarni yaxshi ko‘rib o‘qishim mumkin, lekin aynan biron obraz uchun emas. Meni personajlardan ko‘ra asarning tili, syujeti tortadi. Biron ayol personajni yaxshi ko‘rishim uchun u ideal ayol bo‘lishi kerak, hali bunaqasini uchratmadim. Bu da’voyim g‘alati tuyilishi mumkin. O‘zimizning asarlarda ayollar tor doirada tasvirlanadi deyarli, chet el adabiyotida esa erkinlikning aqlim va goh tarbiyam bovar qilmas chegarasida…

6. Siz yaxshi ko‘rgan erkak personaj.

X.S: Martin Iden.

I.U: Bu savolga ham ayol personaj haqidagi javobim.

7. Tarixdagi siz yaxshi ko‘rgan qahramonlarni ayta olasizmi?

X.S: Payg‘ambar alayhissalom, Amir Temur.

I.U: Hech bir tarixiy qahramonni yaxshi ko‘rmayman, taniyman xolos, bilmayman u shaxslarni. Qaysidir jihatdan hurmat qiladiganlarim ko‘p.

8. Real hayotda siz eng hurmat qilgan ayol.

X.S: Shubhasiz, rahmatlik onam…  

I.U: Real hayotda tanishlarim uncha ko‘p emas, yaqindan taniydiganlarim esa jigarlarim xolos. Onamni bir qaraganda oddiy, hamma qatori o‘tgan hayotlarida u hayotning oddiy ko‘rinishiga sabab bo‘lgan sabr-u qanoatlari uchun ham, opalarimni ham shu jihatdan hurmat qilaman. Tanishlardan hurmat qiladiganlarim ko‘p, lekin ba’zida bu tuyg‘u darz yeb qolavergach, shunchaki hurmatga o‘tdim, shunchaki, soxta ham emas, chuqur ham emas. Ba’zi javoblarimga qarab, bu mehrga xasis ekan deb o‘ylamang, yomon deyilgan odamning ham yaxshi tomonini ko‘rishga harakat qilaman. Ko‘r-ko‘rona yaxshi ko‘rolmayman xolos, illo Allohning yaratig‘i deb yaxshi ko‘raman, samimiysi shu.

9. Siz ijodini sevgan rassom kim?

X.S: Kamoliddin Behzod.

I.U: Bu borada tanlovim o‘zgaruvchan. Ayni paytda Adolf Gitlerning kartinalarini kuzatyapman.

10. Siz ijodini sevgan musiqachi yo bastakor kim?

X.S: Yanni (Xrisomallis)

I.U: Betxoven, Vanessa Mey.

11. Bir erkak sizningcha qanday bo‘lishi kerak?

X.S: Avvalo inson bo‘lishi kerak.

I.U:  Iymonli, mas’uliyatli, tadbirkor, o‘qimishli, hunarli.

12. Bir ayol sizningcha qanday bo‘lishi kerak?

X.S: Ona timsolida bo‘lishi kerak…

I.U:  Ayol ham. Va yaxshi ma’noda ayyor.

13. Siz eng sevgan hislat.

X.S: Yaxshilik va kechirimlilik.

I.U: Farosatlilik.

14. Qaysi ishni bajarayotganda o‘zingizni baxtli his qilasiz?

X.S: Ijod vaqtida.

I.U:  Hovli supurayotganimda. To‘g‘risi. Xayol suri-i-ib.

15. Ayni dam kimning o‘rnida bo‘lib qolishni  istardingiz?

X.S: O‘z o‘rnimda… Chunki bu ilohiy bitik.

I.U: Hech kimning. Biz havas qilgan kimningdir ham o‘ziga yarasha kishibilmas og‘riqlari bo‘lishi mumkin.

16. Do‘stlaringizda qanday hislat va fazilatlar bo‘lishini xohlardingiz?

X.S: Oqibatni va oxiratni unutmasliklarini istardim…

I.U:  Hech qanday, ularni shundayliklaricha qabul qilganim uchun ham do‘stlarim-da.

17. Eng katta nuqsoningizni ayta olasizmi?

X.S: Dangasa va ishonuvchanman.

I.U:  O‘tgan yillar xarakterimni ancha o‘zgartirdi, o‘zimni-yu o‘zgalarni o‘tmish-u bugun-u kelajakda o‘ylayverish odatim qolib ketsa yaxshi bo‘lardi, odamovi odamning xayollari ko‘p ham yoqimli bo‘lavermas ekan.

18. Yaxshi ko‘rgan rangingiz qaysi?

X.S: Oq.

I.U:  Ko‘k

19. Siz sevgan gul turi.

X.S: Rayhon… Chunki unda onamni eslayman.

I.U:  Moychechak va qoqigulni «kulib» turishlari uchun, atirgulni ifori uchun yaxshi ko‘raman.

20. Siz sevgan qush turi.

X.S: Qaldirg‘och.

I.U: Tovus, chiroyli patlariga doim mahliyo bo‘laman.

21. Qaysi yozuvchining ijodini yaxshi ko‘rib o‘qiysiz?

X.S: Tog‘ay Murod (Jahon adabiyotidan Chingiz Aytmatov).

I.U: Nodar Dumbadze, Erkin A’zam. O‘zlariga xos uslublari bor.

22. Qaysi shoirning ijodini yaxshi ko‘rib o‘qiysiz?

X.S: Abdulla Oripov (Hozir Shodmonqul Salom).

I.U:  Loyiq Sherali, Andrey Voznesenskiy kayfiyatidaman shu kunlarda.

23. O‘zingizda bo‘lib qolishini orzu qilgan g‘ayritabiiy iste’dod turi bormi?

X.S: Baxshi (doston aytuvchi)

I.U:  Ikkita bor. Biri oshkor – dardmandlarga Allohdan shifo sababchisi bo‘lishni istardim.

24. Qanday o‘lishni istagan bo‘lardingiz?

X.S: Joynamoz ustida…

I.U: Judayam qarib-churimay, og‘rimay-yotib qolmay, qarz-u yuklardan forig‘, oson va go‘zal, kalima keltirib, ro‘zada, sajdada.

25. Hayotdagi shioringiz.

X.S: “Hammasi yaxshi bo‘ladi…”

I.U: «O‘tgan vaqtga achinib o‘tirishga vaqt sarflama».

26. Ayni hozir ruhiy holatingiz qanday?

X.S: Ko‘tarinki.

I.U:  Sog‘inch va xavotirdaman.

Nodirabegim yozib oldi