Nodira Nazar. She’rlar.

0
606
ko'rishlar soni

DUNYo

Nafslar ildiz otib ketgan makonda,

Xiyonat tuniday zir titrasa er.

Qarsakboz kulgular otganda handa,

Yetim yig‘lamasa, ust-boshlari kir.

Chekka-chekkalarga qochib orzular,

Tilini tishlaydi andisha, qo‘rquv.

Bahorga begona bo‘lib tuyg‘ular,

Yomg‘irlar ostida yig‘laydi kulguvvv…

Tarjima qilolmay qalbini hayot,

Qo‘l siltab qo‘yadi notavon do‘stga.

O, gulgun hayoti xayol bo‘lgan

Yot, Yengiliiib yashaydi yig‘loqi kuzga.

O‘zin oqlay olmay qolgan xatodek,

Shunday mahzuuun boqar dunyo o‘ziga.

Shunday mahzuuun boqar Odam Atodek,

Qarolmay Xudoning ko‘ziga…

***

Fursat sirtmog‘ida chayqalar umrim,

To‘xtamay chopadi soat millari.

Shaffof ko‘zgularga yuzimni burdim,

Ko‘zga yaqinlarim – ko‘ngildan nari.

Goh atab chorlasam ismin tun ora,

Tonglar bosh ko‘targay og‘ir uyqudan.

Yuksaklik yuksalib borar tobora,

Tubanliklar yana ko‘rinar tuban.

Vaqt o‘tsa ko‘ngilni sindirib chil-chil,

Ezilgan loshimni ko‘targum qanday?..

Lahzada o‘tadi kechagi ming yil,

Go‘yo jon yurtidan tan quvilganday.

Sokin sabrim bilan mashvarat qurdim,

Qanoat tiyg‘idan halok bo‘ldi nafs.

Oh, nahot, men qattiq ishongan qurbim

Xatoga yetadi, jazoga yetmas!..

QUYOSH

Yerga botsam — ufq deya atasharlar,

Ko‘kka chiqsam, qochar hamma soyasiga.

Menga faqat ko‘zoynakda qarasharlar,

Aylantirib gunohlarin doyasiga…

Men ko‘r emas, ko‘zi ochiq zabonsiz bir,

Ular ojiz — bir-birlarin tanimas hech.

Meni qattiq qiynar faqat bir havotir-

Tonggacha, o, qanday chidar bechora Kech…

XUDBIN

U meni sevmasdi
Shoir bo‘lmasam,
Devona bo‘lmasam
sevmasdi.

ORZU

Olamga o‘xshaydi
Uning ko‘zlari
Ko‘zlarni oladi
Quyoshdek ammo.

SUKUT

Ma’no izlayapman
yashashdan ortiq,
Ortiq yashamakka
yetmasa ham kuch.

SOYa

Kitob varaqlayman —
izlayman hamroh,
Bu tunga o‘zimning
yetmaydi aqlim.

BARG

Izhori dil qilayotgan
oltin kuzakning
qo‘llarida qavjirardi vaqt.

MUSOFIR

Har neni uyiga tashirdi tinmay
Bellari singudek
Qora chumoli.

TAVBA

Keksaygan insonning
ko‘zlariga razm solganda
Etlarim jimirlar vaznsizlikdan.

EHSON

Tuynukdan tushayotgan bu
nurning aksi bor.
Kechagi kitoblarimda.

Javob yozing

Izoh yozing
Ismingizni kiriting