Bolalar uchun she’rlar

0
288
ko'rishlar soni


Kitob do‘stdir

Kitob bilimlar koni
Komillikka yetaklar.
Bilimdonlar makoni,
Erur kitob do‘koni.

Kitob jonajon do‘stdir,
U bilan aqling o‘stir.
To‘ldir kitob javoning
O‘qi chiqar savoding.

Tipratikan

Sochlarimdir tikondan,
Do‘stga ozor bermaydi.
Qo‘rqmagayman ilondan
U ham aslo tegmaydi.

Do‘stlarimga tegsa u
Tikonlarim xanjarday.
Qochib qutilolmas u
Tashlanaman ajdarday.


Ho‘tikvoy

Nega homush tortasan?
Ho‘tikvoyim, ho‘tikvoy.
Kim qildi seni xafa
Aytgin, bo‘lar holi voy!

E’tibor bermagin hech,
Qulog‘i uzun desa
Kuylagin erta-yu kech,
Ovozi hunuk desa.


Jo‘ja Xo‘roz

Saharlab jo‘ja Xo‘roz
Quyoshga chiqar peshvoz.
Uyg‘otadi har tongda,
Qichqirib, baland ovoz.

Holimaydi, tolmaydi.
Ogohlikka chorlaydi.
O‘zi mitti bo‘lsa ham,
Aslo uxlab qolmaydi.


Quyoncha

Uzun quloq quyoncha
Dikir-dikir sakraydi.
Sakrab-sakrab inidan
Chiqmoqchiga o‘xshaydi.

Savat to‘la karamni
Kirttilatib yedilar
To‘la kuchu-quvvatni
Sarflash kerak dedilar.

Akajon-ukajonlar
O‘rnimni hech bildirmang,
Ota onam kelguncha,
Bir aylanib kelaman.

Uzun quloq quyoncha
Dikir-dikir sakraydi.
Sakrab-sakrab inidan
Chiqmoqchiga o‘xshaydi.


Tulki va Tarvuz

O‘rmonda yo‘lak bo‘ylab,
Tarvuz ketar yumalab.
Buni ko‘rgan Tulkivoy
Yutmoq bo‘ldi,bir yamlab.

-Nima balo bo‘g‘irsoq
Yo‘l-yo‘l to‘nni kiyibsan?
Qay tomonga shoshalab,
«Bo‘g‘irsoq» ketayapsan?

Tarvuzjon so‘zlamoqqa
Otlangan edi birdan

Qulog‘im og‘irroqda
So‘zlagin yaqinroqdan.

«Quloqqinam eshitmas,
Burnimga chiq amallab,
Balki shunda so‘zlaring
Eshitilar jaranglab»

Tarvuz ikki qilmasdan
Tulkivoyning so‘zini,
Sakrab chiqib burniga
Tanishtirdi o‘zini.

-Men bo‘g‘irsoq emasman!
Tarvuzdir mening ismim.
O‘stirgan bobodehqon
Vatanimdir polizim!

Tulkivoyning burnida,
Qattiq og‘riq sezildi.
Tarvuzjonni, bo‘g‘irsoq
Emasligin tushundi.

Ayyor Tulkivoyning ham
Birdan ovozi tindi…
Tarvuz ketdi yumalab…
Tulkining burni sindi.

Tozagul Jumanova

Javob yozing

Izoh yozing
Ismingizni kiriting