fristayl
kim aytdi
meni baxtsiz deb?
faqat
kim bilandir
do‘stona quchoqlashgim kelyapti
bag‘rimga bosgim kelyapti
bag‘riga bossa kimdir meni
ammo
yo‘q
kerak emas ekan
men sizga ishonmayman
bilasizmi shuni?
men
zotan
hammangizga ishonmayman
quchoqlamang meni
bag‘ringizga bosmang
qanday odamsiz siz o‘zi
kim aytdi sizga o‘zi
kim aytdi
meni baxtsiz deb?
***
siz
rost quchoqlamaysiz
rost gapirmaysiz
rost sevmaysiz
shunaqayam odam bo‘ladimi?
kim siz o‘zi?
nega unaqasiz?
jinniroqmisiz?
nega hamma narsani yolg‘on amalga oshirasiz?
siz
rost jim turmaysiz
rost kulmaysiz
rost yashamaysiz
odam ham shunaqa bo‘ladimi?
meni baxtsiz deb eshitgan bo‘lsangiz
menga nima?
aytgancha
siz
rost eshitmaysiz-ku
siz o‘zi rost eshitganmisiz?
eshitganmisiz o‘zi?
agar qulog‘ingiz bo‘lmaganida
sizni garang derdim
kim aytdi sizga
meni baxtsiz deb?
***
men sizni
quchoqlagan ham bo‘lardim
quchoqlab
yig‘lagan ham bo‘lardim
ammo
sizdagi bag‘ir
yolg‘on bag‘irdir.
men sizni yomon ko‘rib ketyapman
bir vaqtlar
yaxshi ko‘rib ketgandim
siz yaxshimassiz-ku
zotan
siz ham yaxshimisiz?
qo‘ying-e
siz
rost eslamaysiz
rost sog‘inmaysiz
rost yig‘lamaysiz
yig‘lash emish
sizdagi ko‘z o‘zi rostakam ko‘zmi?
o‘sha ko‘zingizmi o‘zi?
ko‘z bo‘lsa
nega yig‘lamaysiz?
g‘alatimisiz?
odam yig‘lamaydimi bundoq
e qo‘ying-e
menga yoqmadi
menga yoqmadingiz
hayron qolaman
kim aytdi sizga
meni baxtsiz deb?
***
meni baxtsiz deyishgan bo‘lsa
yolg‘on gapirishibdi
ishonmang ularga
xohlasangiz ishoning
menga desa o‘lib ketmaysizmi
siz boshladingiz buni
men ham o‘lsam
sizga farqi yo‘q-ku
nega unaqasiz o‘zi?
nega sevmaysiz?
men-ku mayli
nega hech bo‘lmasa
boshqasini sevmaysiz?
jinniroqmisiz
baribir?
odam sevadi-ku
odam kimnidir sevishi kerak-ku
yoki tug‘ilganingizda
yurak yetishmovchiligi bo‘lganmi?
meni baxtsiz deyishgan bo‘lsa
yolg‘on gapirishibdi xullas.
***
meni baxtli ekanimni
ko‘rasiz hali
agar anavi ko‘zingiz rostakam bo‘lsa
unda nimadir ko‘rinsa
ko‘rasiz hali
faqat
hozir
uxlagim kelyapti
achchiq choy ichib
keyin uxlayman
o‘zim damlayman choyni
men rost choy damlayman
aldamayman choynakni
choydan yaxshilab ko‘p solaman
keyin uxlayman
siz esa
dam oling
damingizni oling
men esa ketdim
uxlagani.
Ahmad Ali Muhammad
