ЯПОН МУМТОЗ ШОИРИ
(1763-1828 )
***
Ҳашаротлар-ла
Боплар кимдир куйлашни.
Кимдир эса-йўқ.
***
Турп кавлаётган
Деҳқон менга турп билан
Кўрсатади йўл.
***
Далада ҳўкиз
Ёлғиз кетиб борар ер
Ҳайдаётгандек.
***
Пешинда мизғиб
Уялгум шолизорда
Куйланса қўшиқ.
***
Қирғий қийқирар
Худди пайқаб қолгандек
Тоғни ногаҳон.
***
Янги йил тонги.
Ҳовуздаги ўрдаклар
Қилишар қий-чув.
***
Олча гуллари
Остида жон сақламоқ
Кўп ғайриоддий!
***
Қабрларни ҳатлаб
Зиёрат қилгум кучук
Бошчилигида.
***
Қор эримоқда…
Болакайларга тўлган
Қишлоқнинг бағри.
***
Ёз кечасида
Пичирлашар ўзаро
Ҳатто юлдузлар.
***
Серташвиш ишмас
Эй, олхўри дарахтим
Рости, гулламоқ!
***
Пешин пайтида
Мизғидинг дея ҳеч ким
Бермайди танбеҳ.
***
Ҳомуза тортар
Баҳор ёмғири пайти
Дўндиқ ойимқиз.
***
Хазин тус берар
Куй олча ва одамлар
Юзига тунда.
***
Фарқ қилмас бешак
Йиғлоқи бир жувондан
Тоғнинг каккуси.
***
Отам-ла тонгни
Кутган бўлардим яшил
Далалар узра.
***
У хушлаб терган
Алвон гуллар тўкилар
Куз шамолида*.
*- бу хокку Иссанинг қизига бағишланган бўлиб, шоир уни қизи ўлимидан ўттиз кун ўтиб ёзган.
***
Ойимқиз чайнар
Шитирлатиб ўралган
Гуручли нонни.
***
Пашша қувишни
Ўйладим сўнгги пайтлар
Отам юзидан.
***
Гулларга боқиб
Бу дунёда юрамиз
Дўзах томида.
***
Уйдан чиқаман.
Пашшалар роҳатланинг,
Ишққа беринг йўл!
***
Буддада измим
Гарчи чивин тутишда
Этсам-да давом.
***
Эй, ўргимчаклар
Нўноқ уй соҳибиман
Бўлманг безовта!
***
Ойдин тун… Ҳатто
Унинг* нола қилишин
Қўмсайди қалбим.
*- бу ерда аёл киши назарда тутиляпти.
***
Туғилсанг ҳам-жом*
Кунинг битган чоғда ҳам.
Қандай аҳмоқлик!
*- бу ерда чақалоқ ва ўликни жомдаги сувда ювинтириш назарда тутиляпти.
***
Сув юзидаги
Ўрдаклар ҳам бу оқшом
Илҳақми бахтга?!
***
Янги қор ҳақда
Манфаат учун ёзиш-
Санъат эмас ҳеч.
***
Қадрдон қишлоғим…
Тикан санчар уйдаги
Ҳар бир хотира.
***
Кичик ороллар
Далалари шудгорда.
Куйлар тўрғайлар.
***
Янги йил куни
Ҳамма нарса яшнаган
Кўнглимдан бўлак.
Инглиз тилидан Шерзод Ортиқов таржималари.
